Plantun de Prouvènço

Pèr coumpara dos planto d'encò nostre

Pilosella ziziana & Myosotis discolor

Pilosella ziziana

Asteraceae Compositae

Nom en français : Piloselle de Ziz.

Descripcioun :
La peludello-de-Ziz se rescontro dins li tepiero seco de Prouvènço séusouso fin qu'à 2200 m dins lis Aup. Coume lis àutri peludello o esparello èi pas trop bèn couneigudo subretout que douno proun d'èr à la classico peludello-en-paumo, Pilosella cymosa. Pamens es uno planto coumuno que flouris pulèu d'ouro à la primo. Se recounèis à sis enflourejado mens sarrado d'ounte parton de cambo sus li coustat. Li fueio soun peréu pu agudo e pu verdo o verdalo. Coumpara emé la peludello-en-paumo que ié sèmblo proun.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 30 à 80 cm
Fueio : basalo
Tipe bioulougico : Emicriptoufite
Cicle bioulougico : Planto renadivo

Gènre : Pilosella
Famiho : Asteraceae
Famiho classico : Compositae
Tribu : Cichorieae
Ordre : Asterales

Coulour de la flour : Jauno
Petalo : >6
Ø (o loungour) enflourejado : 1 à 1,5 cm
Flourido : Printèms - Estiéu

Sòu : Si (Ca)
Autour basso e auto : 100 à 2200 m
Aparado : Noun
Mai à juliet

Liò : Tepiero seco - Bos clar - Ermas
Estànci : Mesoumediterran à Subaupen
Couroulougi : Éurasiatico-Cèntre-Ouèst
Ref. sc. : Pilosella ziziana (Tausch) F.W.Schultz & Sch.Bip., 1862 (= Hieracium zizianum Tausch, 1828 )

Te-vese-e-t'ame(-di-dos-coulour)

Myosotis discolor

Boraginaceae

Àutri noum : Ti-viéu-e-t'aìmi, Uei-de-l'enfant-Jèsu.

Noms en français : Myosotis bicolore, Myosotis de deux couleurs.

Descripcioun :
Aquéu te-vese-e-t'ame, coume lou dis soun noum, a de flour de dos coulour, jauno pièi bluio. Es uno planto pas trop coumuno que trachis dins li pelouso sablouso bagnado l'ivèr. Isto uno meno proche que ié dison lou te-vese-e-t'ame-doutous, Myosotis dubia, que vèn dins li mémi relarg, que fai de flour d'abord blanco, pu pichoto e que la cambo, pu grando elo, a pas jamai li fuio d'en aut "óupousado".

Usanço :
Li flour podon se bouta dins lou mesclun. Se dis que li te-vese-e-t'ame soun vertuous contro l'enflamacioun, majamen pèr lis iue ("principe di signaturo").